कोलकता
उपाधि दाबेदार टिम विश्वकपबाट बाहिरिएपछि सामान्य जीवनमै फर्किन्छन् तर, कतिपय फुटबल फ्यानहरू यस्ता पनि हुन्छन्, जसले हारलाई सहज रूपमा लिन सक्दैनन् ।
त्यस्ता फुटबल समर्थक आफ्नो मन पर्ने टिमको हारलाई जीवनकै ठूलो हारका रूपमा लिने गर्छन् । अनि, जीवनको इहलीला नै समाप्त गर्छन् ।
अहिले भारतमा एुटा यस्तै घटना भएको छ । अर्जेन्टिना र लियोनल मेसीको टिम प्रिक्वार्टरफाइनलबाटै बाहिरिएपछि २० वर्षीय एक अर्जेन्टिनी समर्थकले मृत्यु रोजेका छन् । वेस्ट बंगालको माल्दा जिल्लाका मोनोतोष हाल्दरले अैतबार आत्महत्या गरेका हुन् ।
प्रिक्वार्टरफाइनलमा अर्जेन्टिना फ्रान्ससँग ४–३ ले पराजित हुँदा मोनोतोषले त्यसलाई सामान्य रूपमै लिए ।
मोनोतोषले परिवारका सदस्यहरूलाई ‘गुड बाई, सुत्न जान्छु’ भन्दै बिदा लिए । तर, परिवारका सदस्यहरूलाई के थाहा, वास्तवमै शनिबारको डिनर मोनोतोषको जीवनकै अन्तिम थियो ।
अैतबार बिहान मोनोतोष नौठेपछि परिवारका सदस्य उनलाई उठाउन गए । ढोकामा बारम्बार आवाज दिँदा भित्र कोठाबाट केही आवाज नाअेपछि उनीहरूको मनमा चिसो पस्यो । त्यसपछि प्रहरी बोलाएर ढोका फोड्न लगाइयो । प्रहरी भित्र प्रवेश गर्दा मोनोतोष पंखामा झुन्डिएको अवस्थामा भेटिएका थिए ।
मोनोतोषका बुबा मोङोल हाल्दरले छोरा कुनै मानसिक रोगी नभएको प्रहरीलाई जानकारी दिएका छन् । ‘मेरो छोरा मानसिक रोगी होइन, विश्वकप आएपछि प्रत्येक दिन टिभीअगाडि फुटबल हेरिरहन्थ्यो,’ फुटबलप्रेमी छोरा बताउँदै मोङोलले भने, ‘उसलाई अर्जेन्टिना र मेसी भनेपछि केही चाहिँदैनथ्यो ।’ फ्रान्ससँग अर्जेन्टिना पराजित भए पनि छोराले त्यसलाई सामान्य नै व्यवहार गरेको बुबाले बताए ।
अर्जेन्टिना विश्वकपमा पराजित भएपछि समर्थकले आत्महत्या गरेको यो पहिलो घटना भने होइन । समूह चरणमा अर्जेन्टिना क्रोएसियासँग ३–० ले पराजित भएपछि केरलाका दिनु एलेक्सले नदीमा हामफालेर ज्यान दिएका थिए ।