यी हुन् नेकपाभित्र शीर्ष नेता विवादको खास कारण
काठमाडौँ — प्रधानमन्त्री एवं नेकपा अध्यक्ष केपी ओली राष्ट्रसंघ महासभामा भाग लिन अमेरिका गएका बेला अर्का अध्यक्ष पुष्पकमल दाहाल श्रीमतीको उपचारका लागि सिंगापुर उडे । दुवै अध्यक्ष मुलुकमा नभएको मौकामा वरिष्ठ नेता माधव नेपालले संसदमा सरकारको आलोचना गरे । लगत्तै राजधानीमा स्थायी समिति सदस्यहरूको भेला राखे ।
निर्मला हत्या प्रकरण : न्यायका लागि जो मृत्युको मुखमा पुगे
कञ्चनपुर — निर्मला पन्तको बलात्कार र हत्याका वास्तविक दोषी पत्ता लगाउनुपर्ने माग गर्दै चर्केको आन्दोलनमा भदौ ८ गते प्रहरीको गोली लागेर १ जनाको मृत्यु भयो । सामाजिक सञ्जाल तथा विभिन्न सञ्चार माध्यममा मृत्यु हुनेको नाम चेतन भट्ट भनेर आयो । धेरैले आफ्नो फेसबुकवालमा उनको तस्बिर राखेर श्रद्धाञ्जली दिँदै ‘अलबिदा चेतन’ पनि भन्न भ्याए ।
भदौ ८ गते प्रहरीको गोली लागेर घाइते भएका चेतन भट्ट । पाखुरामा गोली लागेपछिको घाउ देखाउँदै । तस्बिरः भवानी भट्ट
बबई पुलमा बदमाशी : पप्पुका मालिकसहित १२ विरुद्ध ९० करोडको मुद्दा, कोविरुद्ध कति बिगो ?
काठमाडौँ : अख्तियार दुरुपयोग अनुसन्धान आयोगले पप्पु कन्स्ट्रक्सनका तत्कालीन अध्यक्ष हरिनारायण रौनियारसहित १२ जनाविरुद्ध ९० करोडको भ्रष्टाचार मुद्दा दर्ता गरेको छ।
संघीय समाजवादी फोरम नेपालका सांसदसमेत रहेका पप्पुका तत्कालीन अध्यक्ष हरिनारायणप्रसाद साह रौनियार र उनका छोरा सुमित रौनियारसहित १२ जनाविरुद्ध ९० करोड ८९ लाख २ हजार ५ सय ८ रुपैयाँ बिगो दाबी गर्दै अख्तियारले शुक्रबार विशेष अदालतमा मुद्दा दायर गरेको हो ।
पप्पुका बाबु छोराविरुद्ध साढे ३८ करोड बिगो
अख्तियारका सहप्रवक्ता मदन कोइरालाका अनुसार पप्पुका तत्कालीन अध्यक्ष हरिनाराणविरुद्ध १९ करोड ३२ लाख २५ हजार ६ सय ९५ रुपैयाँ बिगोसहित विशेषमा मुद्दा दायर गरिएको हो ।
त्यसैगरी उनका छोरा तथा पप्पु कन्स्ट्रक्सनका अध्यक्ष सुमित रौनियारविरुद्ध पनि अख्तियारले १९ करोड ३२ लाख २५ हजार ६ सय ९५ रुपैयाँ नै बिगो दाबी गर्दै मुद्दा चलाएको हो ।
अधिकांश इन्जिनियर परे
अख्तियारले एभरेस्ट इन्जिनियरिङ कन्सलट्यान्टका प्रोप्राइटर कृष्णदेव यादवविरुद्ध एक लख ४१ हजार २५० रुपैयाँ बिगो दाबी गर्दै मुद्दा चलाएको छ । त्यसैगरी तत्कालीन डिभिजन सडक कार्यालय नेपालगन्जका प्रमुख भानु जोशीविरुद्ध अख्तियार फरक दुईवटा बिगो दाबी गर्दै मुद्दा चलाएको छ ।
अख्तियार जोशीविरुद्ध एक लख २४ हजारको एउटा बिगो र एक करोड ९५ लाख ८८ हजार ४३७ रुपैयाँसहित जम्मा एक करोड ९७ लाख १३ हजार ४ सय ३७ रुपैयाँ बिगो दाबी गर्दै मुद्दा चलाएको हो ।
त्यसैगरी यही प्रकरणमा अख्तियारले डिभिजनल सडक कार्यालयका अर्का तत्कालीन प्रमुख मनोज श्रेष्ठविरुद्ध पनि ९ करोड २४ लाख २४ हजार ९९ रुपैयाँ बिगो दाबी गर्दै मुद्दा चलाएको हो ।
यो प्रकरणमा अख्तियारको अभियुक्तको सूचीमा अधिकांश डिभिजन सडक कार्यालय नेपालगञ्जका इन्जिनियर परेका छन् । यही कार्यालयका तत्कालीन प्रमुख राजेशकुमार यादवविरुद्ध पनि अख्तियारले दुईवटा बिगो दाबीसहित मुद्दा चलाएको छ । यादवविरुद्ध ७४ लख ५३ हजार २ सय ६९ रुपैयाँको एउटा र ३ करोड १४ लख १८ हजार ९ सय ७ रुपैयाँको अर्को बिगो दाबी गर्दै मुद्दा चलाइएको हो ।
त्यसैगरी डिभिजन सडक कार्यालयका तत्कालीन निमित्त प्रमुख नवराज केसीविरुद्ध पनि अख्तिायरले ६ करोड ९२ लाख ४६ हजार ९ सय १२ रुपैयाँ बिगोसहित मुद्दा दर्ता गरेको छ ।
त्यसैगरी यही कार्यालयका इन्जिनियर प्रेमप्रसाद चुवाईविरुद्ध ३ करोड १९ लाख ३८ हजार ५ सय ७९ रुपैयाँ बिगो दाबी गरिएको छ । यही कार्यालयका इन्जिनियर हरिबहादुर खड्काविरुद्ध ७ करोड ५४ लाख ४८ हजार ६१ रुपैयाँ, इन्जिनियर दीपेन्द्रबहादुर विस्टविरुद्ध १ करोड ६१ लाख ८३ हजार ४४५ रुपैयाँ, यही कार्यालयका सब-इन्जिनियर कर्मा तेन्जिङ तामाङविरुद्ध १५ करोड ८८ लाख ४ हजार ७ सय १३ रुपैयाँ बिगो दाबी गरिएको छ ।
यही कार्यालयका अर्का सब-इन्जिनियर गोविन्द गैरेविरुद्ध अख्तिायरले १ करोड ९५ लाख ८८ हजार ४३७ रुपैयाँ बिगो दाबी गरिएको छ। अख्तियारले पप्पुका तत्कालीन अध्यक्ष हरिनारायण र उनका छोरा तथा पप्पुका अध्यक्ष सुमितविरुद्ध समान १९ करोड ३२ लाख २५ हजार ६ सय ९५ (जम्मा ३८ करोड ६३ लाख ५१ हजार ३ सय ९०) रुपैयाँ बिगो दाबी गरिएको छ ।
कहाँ गरेका थिए गडबडी ?
अख्तियारका सह-प्रवक्ता कोइरालाका अनुसार पप्पु कन्स्ट्रक्सनले बर्दिया सदरमुकाम गुलरिया र बारबर्दिया नगरपालिका जोड्ने जब्दीघाटको बबई पुल निर्माणमा गुणस्तरहीन सामाग्री प्रयोग भएको भेटिएको छ।
पुल बनाउँदा नै बाङ्गो देखिएको अवस्थामा उद्घाटन नहुँदै भत्किएको उक्त पुल निर्माणको सुरुदेखि नै कर्मचारीको मिलेमतोमा भ्रष्टाचार भएको ठहर अख्तियारले गरेको हो ।
डिभिजन सडक कार्यालय नेपालगञ्ज र पप्पु कन्स्ट्रक्सनले पोखरिया-७ को यो पुल निर्माणका लागि सम्झौता भएदेखि नै संलग्न सबै प्राविधिक कर्मचारीबाट गम्भीर लापरवाहीलाई नसच्याई त्रुटीपूर्ण कामलाई स्वीकार गरेको आरोप पनि अख्तियारको छ।
अख्तियारले पुल निर्माणका क्रममा फिल्डको नाँपजाँच हचुवाको भरमा गरेको, गुणस्तरीय पुल निर्माणका लागि गरिने ग्यारेन्टी निर्माण पक्षबाट कर्मचारीले नगराएको पनि जनाएको छ।
त्यसैगरी आवश्यक जाँच नगरिँदा निर्माण सामाग्रीको गुणस्तर नियन्त्रण प्रभावकारी नभएको तथा गुणस्तर प्रमाणित नभइकन भुक्तानी सिफारिस गरेको पनि जनाएको छ ।
कर्मचारीले पनि ठेकेदारको बदमाशीलाई चुपचाप स्वीकार गरेको अख्तियारले जनाएको छ। उक्त पुलमा निर्माण व्यवसायी तथा निर्माण अवधिमा संलग्न सम्पूर्ण प्राविधिक कर्मचारीको मिलेमतो भएको पुष्टि भएकाले पप्पुका दुवै मालिक र सडक कार्यालयका तीनजना डिभिजन प्रमुखसहित १२ जनाविरुद्ध विशेष अदालतमा आरोपपत्र दायर गरिएको जनाएको छ ।…….( भनेर आज को अन्नपुर्न पोस्ट् मा लेखिएको छ। / published in Todays Annapurna Post)
नादिया मुरादको कथा : १९ वर्षमा यौनदासी, २५ वर्षमा नोबेल पुरस्कार
‘यस वर्षको नाेबेल शान्ति पुरस्कार कसले पाउला ?’ भन्दै संसारभर भएका अनुमानलाई गलत सावित गर्दै इराकको युद्धग्रस्त गाउँमा हुर्किएकी २५ वर्षीया युवतीले बाजी मारेकी छन् ।
अहिले गुगलमा सम्भवतः सबैभन्दा धेरैले खोजी गरिएको व्यक्ति यदी कोही भए उनै नादिया मुराद हुन् । उत्तरी इराकको कोजो गाउँदेखि अमेरिकाको संयुक्त राष्ट्रसंघ भेलासम्म उनको यात्रा संघर्ष र पीडाले मात्रै भरिएको छ ।
पछिल्लो समय त नादियाले आफूलाई मानव अधिकार अभियन्ताको रुपमा उभ्याइसकेकी छन् । तर छोटो समयमै उनले भोगेको पीडा र लामो यात्रा प्रेरणादायी पनि छ ।
सन् २०१४ को अगस्टमा नादिया १९ वर्ष मात्रै पुगेकी एक स्कुले छात्रा थिइन् । त्यसबेला उनले आफ्नै गाउँ कोजोमा इस्लामिक स्टेटको भयानक हमला देखिन् । त्यसबेला इस्लामिक स्टेटको हमलामा परी उनले आफ्नै परिवारका ६ जना दाजुभाइ र आमालाई गुमाउनु पर्यो ।
यही बेला पनि नादिया इस्लामिक स्टेटको अपहरणमा परिन् । इस्लामिक स्टेटको अपहरणमा परेका ६ हजार ७ सय भन्दा बढी अपहरित याजिदी महिलामध्ये नादिया एक थिइन् ।
नादियालाई मोसुल सहरमा यौन दासी बनाएर राखियो । नादियाले मिडियालाई दिएको अन्तरवार्ताअनुसार त्यसबेला उनलाई आततायी रुपमा पिटियो । चुरोटको ठुटोले ठोसियो । जब उनी भाग्न खोज्थिन् उनलाई बलात्कार गरिन्थ्यो । एक दिन उनको मालिकले ढोका खुल्लै राखेको समय पारेर नादिया त्यहाँबाट भागिन् ।
तीन वर्षपछि सन् २०१७ को जुन १ मा उनी आफ्नो गाउँ कोजो फर्किन् । त्यसपछि उनी उत्तरी इराक इराकको दुहोक शरणार्थी क्याम्पमा पुगिन् । फेब्रुअरी २०१५ मा नादिया बार्ङ्गा शरणार्थी क्याम्पमा बसिरहेको बेला केही पत्रकारलाई पहिलो पटक आफ्नो पीडादायी यथार्थ सुनाइन् । यस क्रममा सन् २०१५ मा जर्मन सरकारले प्रायोजन गरेको एक कार्यक्रमअन्तरगत यहाँका एक हजार पीडित तथा शरणार्थी महिलाका लागि नयाँ घर बनाइदिने भयो । यसको फाइदा नादियालाई पनि मिल्यो ।
सन् २०१५ डिसेम्बर १६ को दिन नादियाले यूएनको राष्ट्रिय सुरक्षा परिषदमा मानव बेचबिखन र द्धन्द्ध विषयमाथि आफ्नो धारणा राख्न पाइन् । र मानव बेचबिखनमाथि यूएनमा यही पहिलो बहस थियो ।
अब मुरादले एम्बेसडरको रुपमा विश्वभर र स्थानीय स्तरमा शरणार्थी तथा मानवबेचबिखन विषयमा सम्बोधन गर्नेछिन् । संसारकै प्रतिष्ठित मानिने नोबेल शान्ति पुरस्कार पाउने दोस्रो कान्छी युवती हुन् नादिया ।
यौन हिंसा अन्त्यका लागि प्रयास गरेवापत सन् २०१८ मा नोबेल शान्ति पुरस्कार पाएकी हुन् । यस वर्षको नोबेल शान्ति पुरस्कार नादिया र कंगोका डेनिस मुकेगेले संयुक्त रुपमा पाएका हुन्।…….( भनेर आज को अन्नपुर्न पोस्ट् मा लेखिएको छ। / published in Todays Annapurna Post )
नाफा खोज्ने निजी एयरलाइन्सलाई उडानमा रोक
हुम्ला, असोज १९ गते । नेपालगञ्ज–सुर्खेतबाट हुम्लाको लागि उडान भर्दै आएका विभिन्न निजी एयरलाइन्सले केही दिनदेखि आफ्नो फाइदालाई लक्षित गर्दै जिल्लामा कम उडान भरेर पूर्वमा उडान भर्न शुरु गरेका छन् ।
एयरलाइन्सको व्यापारिक स्वार्थका कारण दशैँ, तिहारमा जिल्ला भित्रिने जिल्लावासी र जिल्लामा कार्यरत कर्मचारी जिल्ला बाहिर जान समस्या भएको छ । निजी एयरलाइन्सले उडानमा कमी ल्याएको भन्दै सिमकोट गाउँपालिकाको बिहीबार बसेको गाउँ सभाले दशैँ, तिहारजस्ता पर्वमा हुम्लाका लागि उडान नभरेमा निजी एयरलान्सलाई सधैँका लागि उडानमा रोक लगाउने निर्णय गरेको छ ।
हुम्लीहरू अहिले नेपालगञ्ज–सुर्खेतमा हवाईजहाजले कम उडान गर्दा यात्रु टिकटका लागि भौतारिरहेका छन् । कहिले महँगो भाडा, कहिले जहाज टिकट नपाउने यो हुम्लीको समस्या नयाँ होइन । बैठकले सिमकोट गाउँपालिकाका प्रतिनिधि, प्रमुख जिल्ला अधिकारी सञ्चाकर्मीलगायतको सोे निर्णय गरेको हो । रासस……… ( भनेर आज को गोर्खापत्र मा लेखिएको छ।/ published in Todays Gorkhapatra)
ताइवानी पर्यटकको मृत्यु
सोलुखुम्बु, असोज १९ गते । लेक लागेर खुम्बुमा एक विदेशी नागरिकको मृत्यु भएको छ ।
ताइवानी चेनारी च्याङको मृत्यु भएको जिल्ला प्रहरी कार्यालय सोलुखुम्बुका सूचना अधिकारी एवं प्रहरी नायब निरीक्षक उदयप्रसाद कटेलले जानकारी दिनुभयो । सगरमाथा आधार शिविर घुम्न आएका च्याङकोबिहीबार साँझ मृत्यु भएको प्रहरीले जनाएको छ ।
खुम्बु पासाङल्हामु गाउँपालिका– ४ स्थीत लबुचे मदर अर्थ भन्ने होटलमा आराम गरी बसैकै अवस्थामा मृत्यु भएको बताइएको छ । करीब ४५ वर्षीया च्याङ गत १३ गते नेपाल हाइटिङ टिम कम्पनी काठमाडौँमार्फत घुम्न आएका थिए । अहिले इलाका प्रहरी कार्यालय नाम्चेबाट प्रहरीको टोली हेलिकप्टरमार्फत घटनास्थलमा पुगिसकेको बताइएको छ । आवश्यक कानूनी प्रक्रिया पूरा गरी शव परीक्षणका लागि काठमाडौँ पठाइने छ । (रासस) ……… ( भनेर आज को गोर्खापत्र मा लेखिएको छ।/ published in Todays Gorkhapatra )
शान्ति प्रक्रिया बुझ्न अफगानिस्तान र म्यानमारको टोली काठमाडौंमा
अफगानिस्तानको शान्ति परिषद टोली नेपाल आएर फर्केको तीन साताभित्र म्यानमारको शान्तिवार्ताको टोली नेपालको शान्ति प्रक्रियाको बारेमा बुझ्न काठमाडौं आइपुगेको छ । टोलीले शुक्रबार उपराष्ट्रपति नन्दबहादुर पुन र परराष्ट्रमन्त्री प्रदीप ज्ञवालीसँग शान्ति प्रक्रिया बारे बेग्ला बेग्लै छलफल गरेको छ । यसअघि, असोज अन्तिम साता अफगानिस्तानको टोली काठमाडौं आएको थियो ।
नेपालको शान्ति प्रक्रियाको अध्ययन गर्न म्यानमारको ‘ज्वाइन्ट मनिटरिङ कमिटि यूनियन लेभल अन सिजफाइर’को टोलीसँग उपराष्ट्रपतिले भने, ‘म्यानमारको शान्ति प्रक्रियामा प्रगति भइरहेको सुन्दा खुसी लाग्यो । त्यहाँको शान्ति प्रक्रियामा सघाउन परे हामी तयार छौँ ।’ म्यानमारमा युद्ध विरामपछि त्यसको अनुगमन गर्न गर्न बनेको टोलीमा सेना, विद्रोही सेना र नागरिक समाजका प्रतिनिधि सहभागी छन् । यही टोली अहिले आएको हो ।
उपराष्ट्रपति पुनले म्यानमारको शान्ति प्रक्रिया सफलताको शुभकामना दिएका छन् । पुनका प्रेस संयोजक मनोज घर्ती मगरका अनुसार पुनले म्यानमारमा जारी युद्ध विराम स्थायी शान्तिमा परिणत हुने अपेक्षा गर्दै आवश्यक परे शान्ति प्रक्रियामा नेपालले सहयोग गर्ने आश्वासन दिएका छन् ।
‘सरकार र सेना जिम्मेबार बनोस’
शान्ति प्रक्रिया सफल राज्यपक्ष बढी जिम्मेवार हुनु पर्ने उपराष्ट्रपति पुनले बताए । उनले भने, ‘म्यानमारको शान्ति प्रक्रियाका लागि स्वभावैले त्यहाँको सरकार र सेना बढी जिम्मेवार हुनु पर्दछ भन्ने मलाई लाग्छ ।’
उपराष्ट्रपतिले नेपालको शान्ति प्रक्रिया विश्वकै नमूना भएको तथा नेपालको द्वन्द्व राजनीतिक एजेण्डामा भएकाले शान्ति प्रक्रियालाई सफल पार्न सहज भएको बताए । ‘हामी दाबाका साथ भन्न सक्छौँ कि नेपालको शान्ति प्रक्रिया विश्वकै नमूना हो ।
नेपालको शान्ति प्रक्रिया नेपाली मौलिकताको रह्यो’, उपराष्ट्रपति पुनले भने, ‘नेपालको शान्ति प्रक्रियाबाट म्यानमारले सिक्न सक्छ । तर, मेरो सुझाव छ, म्यानमारले आफ्नो मौलिकतामा शान्ति प्रक्रिया पूरा गरोस ।’ उपराष्ट्रपतिसँगको भेटमा म्यानमारको ‘ज्वाइन्ट मनिटरिङ कमिटि यूनियन लेभल अन सिजफाइर’का प्रमुख लेफ्टिनेन्ट जनरल यर प्याईले म्यानमारमा युद्ध विराम रहेको र स्थायी शान्तितर्फ अग्रसर रहेको बताए ।
म्यानमारमा रहेका विभिन्न २१ वटा सशस्त्र समूहमध्ये १० वटा वार्तामा आएको ११ वटा वार्तामा नआए पनि युद्ध विराममा रहेको बताएका थिए । सरकार, वार्तामा रहेको सशस्त्र समूह र नरहेको समूहबीच वार्ता भइरहेको उनको भनाई थियो । ‘हामी अक्टुबर १५ मा युद्ध विरामको तेस्रो वर्षगाँठ बनाउँदैछौँ ।
सरकार र द्वन्द्वरत समूहबीच ५७ बुँदामा सहमति भईसकेको छ । केही बुँदामा सहमतिको प्रयास जारी छ,’ लेफ्टिनेन्ट जनरल प्याईले भने ‘झण्डै ७० वर्षदेखिको द्वन्द्व समाधान तर्फ छौँ ।’ उनले नेपालको नमुना योग्य शान्ति प्रक्रियाबाट म्यानमारले धेरै सिक्न चाहेको बताए । ‘नेपालको शान्ति प्रक्रिया विश्वकै लागि नमूना योग्य हो, त्यही भएर यहाँको शान्ति प्रक्रिया बारे अध्ययन गर्न आएका हौँ,’ उनले भने ।
अफगानिस्तानी टोलीले के गर्यो ?
भदौ अन्तिम साता अफगानिस्तानको हाइ पिस काउन्सिलकाको उच्चस्तरीय प्रतिनिधि मण्डल काठमाडौं आएर राष्ट्रपति विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली, गृहमन्त्री रामबहादुर थापा, परराष्ट्रमन्त्री प्रदीप ज्ञवाली, ऊर्जामन्त्री वर्षमान पुनसँग भेटवार्ता गरेको थियो ।
काउन्सिलका उपप्रमुख डा. हबिबा साराबी नेतृत्वको उच्च शान्ति परिषदको प्रतिनिधि मण्डलले शान्ति प्रक्रिया र त्यसपछिको परिस्थितिबारे छलफल गरेको थियो । अफगानिस्तानमा ४० वर्षदेखि शान्ति प्रक्रिया आरम्भ भएको तर, टुंगोमा नपुगेको अनुभव उनीले सुनाए ।
काउन्सिलका उपप्रमुख साराबीले नेपालको शान्ति प्रक्रियाबाट सिक्नका लागि आफूहरु नेपाल भ्रमणमा आएको बताएकी थिइन् । उनको भनाई थियो, ‘नेपालको शान्तिप्रक्रिया साँच्चीकै विश्वका लागि उदाहरणीय रहेछ ।’ हमिद कारजाई राष्ट्रपति हुँदा गठन भएको काउन्सिल अहिले शान्ति प्रयासमा सक्रिय छ ।…….. ( भनेर आज को नया पत्रिका मा लेखिएको छ। / published in Todays Naya Patrika)
सवारी चालक अनुमति पत्र नदिएको भन्दै बहिरा नागरिक आन्दोलित
सवारी चालक अनुमति पत्र सरकारले नदिएको भन्दै बहिरा नागरिकहरु सडक आन्दोलनमा उत्रिएका छन् ।
संवैधानिक व्यवस्था अनुसार आफूहरुलाई तत्काल सवारी चालक अनुमति पत्रको व्यवस्था गर्न माग गर्दै बहिरा नागरिकहरुले शुक्रबार बिहान काठमाडौंको माइतीघर मण्डलामा धर्ना दिएका हुन् । २०६१ सालदेखि सवारी चालक अनुमति पत्र दिन सरकारको विभिन्न निकायमा गरिएको आग्रह सुनुवाई नभएपछि आफूहरु सडक आन्दोलनमा गर्न बाध्य हुनु परेको राष्ट्रिय बहिरा महासंघ नेपालका अध्यक्ष केपी अधिकारीले जानकारी दिए । महासंघले सवारी चालक अनुमति पत्र पाउनुपर्ने आफूहरुको माग तत्काल सम्बोधन नभए सरकारविरुद्ध कडा आन्दोलन गर्न बाध्य हुने चेतावनी पनि दिएको छ ।
महासंघले २०६१ साल पुस ९ गतेदेखि भौतिक पूर्वाधार तथा यातायात मन्त्रालय र यातायात व्यवस्था विभागसँग पटक–पटक सवारी चालक अनुमति पत्र दिन माग गर्दै आएपनि त्यसलाई सरकारले बेवास्ता गरेपछि सडक आन्दोलन सुरु गरेको हो ।
‘म बहिरा, सवारी साधन चलाउन नपाउने ?’ लेखिएको प्लेकार्डसहित शान्तिपूर्ण प्रर्दशनमा उत्रिएका उनीहरुले चालक अनुमति पत्र अब पनि नदिए सरकारविरुद्ध कडा आन्दोलन गर्न बाध्य हुने चेतावनी दिएका छन् । उनीहरुले ५ सय भन्दाबढी बहिरा नागरिकहरु सवारी चलाउन सक्ने भएपनि सरकारले चालक अनुमति पत्र नदिएर अप्ठयारोमा पारेको गुनासो पनि गरेका छन् । अध्यक्ष अधिकारीले सवारी चालक अनुमति पत्र तत्काल उपलब्ध गराउन र त्यसका लागि आवश्यक परे छलफलका लागि बोलाउन पनि सरकारको गम्भीर ध्यानाकर्षण गराए ।…….. ( भनेर आज को नया पत्रिका मा लेखिएको छ।/ published in Todays Naya Patrika)