काठमान्डौ
दोलखाको लामाबगरमा निर्माणाधीन चार सय ५६ मेगावाटको माथिल्लो तामाकोशी जलविद्युत आयोजनाले सर्वसाधारणका लागि आगमी कार्तिक दोस्रो सातादेखि शेयर निष्काशन गर्ने तयारी गरेको छ ।
आयोजनाले जिल्लाबासीको शेयर बाँडफाँड लगत्तै दोस्रो चरणमा सर्वसाधारणका लागि शेयर निष्काशन गर्ने तयारी गरेको हो । दोस्रो चरणको सेयर आगामी कार्तिक १५ गतेदेखि निष्काशन गर्ने तयारी रहेको आयोजनाले जनाएको छ । दोस्रो चरणमा साधारण सेयरअन्तर्गत सर्वसाधरणका लागि एक करोड ५८ लाख ८५ हजार कित्ता सेयर निष्काशन हुने माथिल्लो तामाकोशी आयोजनाका प्रवक्ता डा. गणेश न्यौपानेले जानकारी दिए ।
न्यौपानेका अनुसार दुई करोड ६४ लाख ७५ हजार कित्ता सेयरमध्ये पहिलो चरणमा दोलखाबासीलाई लक्षित गरी एक करोड ५ लाख ९० हजार कित्ता सेयर निष्काशन गर्ने बताए । स्थानीयलाई शेयर बाँडेपछि सर्वसाधरणका लागि दोस्रो चरणको सेयर कार्तिक १५ गतेदेखि निष्काशन गर्न लागिएको बताएको हो । सेयर बिक्री प्रबन्धकको काम नागरिक लगानी कोष र सनराइज क्यापिटलले गर्ने न्यौपानेले बताए ।
सेयर आह्वानपछि सर्वसाधरणले न्यूनतम ५० कित्ता र अधिकतम हजार कित्तासम्म आवेदन दिन सक्ने छन् । आवेदन फारम बुझाउने अन्तिम मिति कार्तिक १९ गतेसम्म रहेको आयोजनाले जनाएको छ ।