काठमाडौं
सन्दीप लामिछाने आबद्ध दिल्ली क्यापिटल्सले इन्डियन प्रिमियर लिग (आइपीएल) मा कोलकत्ता नाइट राइडर्समाथि रोमाञ्चक जित हात पारेको छ । शनिबार राति भएको खेलमा दिल्लीले कोलकत्तामाथि सुपर ओभरमा जित हात पारेको हो ।
कोलकत्ताले दिएको १८६ रनको चुनौती पछ्याउँदै ब्याटिङ गरेको दिल्लीले निर्धारित २० ओभरमा ६ विकेटको क्षतिमा १८५ रन नै बनाएपछि खेल सुपर ओभरमा मोडिएको थियो ।
सुपर ओभरमा गएको खेल दिल्लीले जितेको छ । पहिला ब्याटिंग गर्दै दिल्लीले एक विकेट गुमाएर १० र बनाएको थियो । कोलकाताका ७ रनमात्र बनाउन सक्यो । यसरी दिल्ली ३ रनले जित्न सफल भयो ।
दिल्लीका लागि सुपर ओभरमा कागिसो राबाडाले बलिंग गरेका थिए । राबाडाले ६ ओटै बल योर्कर गरेर एक विकेट पनि लिएका थिए । दिल्लीका लागि सुपरओभरमा ब्याटिंग गर्न ऋषभ पन्त र कप्तान श्रेयस अय्यर आएका थिए । सुपर ओभरमा अय्यरले एकमात्र चौका हान्न सकेको थियो । कोलकाताका लागि प्रसिद्धा कृष्णाले सुपरओभरमा बलिंग गरेका थिए ।
यसअघि टस जितेर दिल्लीले कोलकातालाई ब्याटिंगको निम्तो दिएपछि कोलकाताले पहिला ब्याटिंग गर्दै दिल्लीलाई १८६ रनको विशाल लक्ष्य दिएको थियो । कोलकत्ताको सुरुवाती इनिङ्स भने ध्वस्त भएको थियो । १६ रन हुदा पहिलो विकेटको रुपमा सन्दीपले निखिल नाइकलाई एल्बिडब्लु आउट गराएपछि कोलकत्ताको विकेट पतन सुरु भएको थियो ।
७.१ ओभरमा ६१ रन हुदा नै ५ विकेट गुमाएको कोलकत्ता निकै धराबमा परेको थियो । तर कप्तान दिनेश कार्थिक र आन्द्रे रुसेलले पारी सम्हालेका थिए । कप्तान दिनेशले ३६ बलमा ५० रन बनाए भने रुसेलले विष्फोटक ब्याटिङ गर्दै २८ बलमै ६२ रन जोडे ।
अघिल्ला दुई खेलमा बेन्चमै रहेका सन्दीपले कोलकत्ताविरुद्धको खेलमा उत्कृष्ट प्रदर्शन गरे । उनले दिल्लीका लागि सबैभन्दा राम्रो बलिङ गरे । चार ओभरमा २९ रन खर्चिएर एक विकेट लिएका सन्दीपले आफ्नै ओभरमा शुबमान गिललाई रनाऔट पनि गराए । त्यस्तै, दिल्लीका लागि हर्षल पटेलले दुई विकेट लिए ।
दिल्लीका लागि पृथ्वी शोले ९९ रन बनाएका थिए भने कप्तान अय्यर ले ४३ रन बनाएका थिए । दिल्लीलाई जितका लागि अन्तिम ओभरमा ६ रन चाहिएको थियो । तर कोलकाताका कुलदीप यादवले ५ रनमात्र दिएपछि खेल सुपर ओभरमा गएको थियो । दिल्लीको यो दोस्रो जित हो भने कोलकाताको पहिलो हार हो ।