कञ्चनपुर
कांग्रेस सभापति एव पूर्व प्रधानमन्त्री शेरबहादुर देउवाले वर्तमान ओली नेतृत्वको सरकारले एक वर्षमा एउटा पनि राम्रो काम नगरेको टिप्पणी गरेका छन् । मंगलबार प्रेस यूनियन कञ्चनपुरले महेन्द्रनगरमा आयोजना गरेको पत्रकार सम्मेलनमा बोल्दै देउवाले सरकारले हत्या, हिंसा, बलात्कारका घटना न्यूनिकरण गर्न नसकेको समेत बताए ।
‘निर्मलाका हत्यारा अहिलेसम्म पत्ता लगाउन सकेको छैन’ देउवाले भने, ‘सरकार बलात्कारी र हत्याराको संरक्षणमा लागेको छ ।’ दिनप्रतिदिन देशभर अपराधिक कृयाकलाप बढ्दै गएकोमा देउवाले चिन्ता व्यक्त गरे ।
सरकारले विदेशीको घुडा टिकेर काम गरिरहेको आरोप लगाउँदै देउवाले चिनियाँ कम्पनीलाई बिना प्रतिस्पर्धा ठेक्का दिएकोप्रति रुष्टता प्रकट गरे । सुदूरपश्चिम विश्वविद्यालय लगायत प्राज्ञिक क्षेत्रमा समेत सरकारले हस्तक्षेप बढाएको भन्दै देउवाले शिक्षा क्षेत्र सरकारले धरासायी बनाउन उद्यत रहेको आरोप लगाए ।
प्रजातन्त्र बिना प्रेस स्वतन्त्रता नहुने भन्दै सभापति देउवाले त्यसको समेत सरकारले हस्तक्षेप गरिरहेको बताए । सभापति देउवाले स्थानीय सरकारले जनतालाई अत्यधिक करको भार थुपारेर अनावश्यक दुख दिएको टिप्पणी गरे ।
सभापति देउवाले सरकारले वार्ताका माध्यामबाट नेकपा विप्लवलाई सहमतिमा ल्याउनुपर्ने धारणा व्यक्त गरे । गुट उपगुट कम्युनिस्टमा पनि रहेको बताउँदै सभापति देउवाले पार्टीमा अन्तर्घात गर्नेमाथि कार्बाही गरिने चेतावनी दिए ।