हेटौँडा
चीनमा सुरु भएर विश्वव्यापी बन्दै गएको कोरोना भाइरस (कोभिड–१९) को सम्भावित सङ्क्रमणको जोखिमलाई दृष्टिगत गरी सरकारले सर्वसाधारणलाई घरबाट निस्कन रोक लगाएसँगै बाग्मती प्रदेशका जिल्ला सदरमुकामलगायतका बजार मङ्गलबार सुनसान बने ।
प्रदेशको राजधानी हेटौँडालगायतका प्रदेशका विभिन्न जिल्लामा बिहानैबाट घरबाट बाहिर ननिस्कन माइकिङ गरी आग्रह गरिएको थियो । साथै प्रहरी परिचालन गरी अत्यावश्यक काममाबाहेक हिँड्डुल गर्नेलाई र सवारीसाधनको आवागमनमा कडाइसँगै रोक लगाइेको थियो ।
बिहानको समयमा सर्वसाधारण र सवारीसाधन सञ्चालकले अटेर र लापरबाही गरेका थिए । प्रहरीको आग्रह र कडाइपछि हिँड्डुल गर्नेको सङ्ख्यामा कमी आएको थियो । कोरोना भाइरसको जोखिम नियन्त्रण तथा रोकथाम गर्न सोमबार सरकारले मङ्गलबार बिहान ६ बजेदेखि चैत १८ गते साँझ ६ बजेसम्म सर्वसाधारणलाई घरबाट निस्कन रोक अर्थात् ‘लकडाउन’ गर्ने घोषणा गरेको छ ।
अनुमति प्राप्त सवारीसाधन, स्वास्थ्यकर्मी, सुरक्षा निकायले प्रयोग गर्नेबाहेक अन्य निजी तथा सार्वजनिक सवारीसाधन आवत–जावतमा पूर्ण रोक लगाइेको प्रहरीले जनाएको छ । ‘लकडाउन’सँगै औषधि, खाद्यवस्तु खरिदजस्ता अत्यावश्यक काममाबाहेक कुनै पनि व्यक्ति घरबाट बाहिर निस्कन नपाउने व्यवस्था गरिएको छ ।
सङ्क्रमण रोग ऐन २०२० को दफा २ को उपदफा (२) बमोजिम कोरोना भाइरस (कोभिड–१९) को रोकथाम र निर्मूल गर्न लकडाउन गरिएको भन्दै उल्लङ्घन गरिएमा कारबाही गरिने सरकारले जनाएको छ ।