लण्डन
कोरोना भाइरसका कारण बेलायतमा शुक्रबारसम्म १६ जना नेपालीको मृत्यु भइसकेको लन्डनस्थित नेपाली दूतावासले पुष्टी गरेको छ ।दूतावासका उपनियोग प्रमुख शरदराज आरनका अनुसार, मृत्यु हुनेमा अधिकांश भूतपूर्व ब्रिटिस गोर्खा सैनिक छन् ।
त्यसैगरी, दूतावासको जानकारीमा अहिलेसम्म बेलायतभरमा करिब १५ जना नेपाली कोरोनाको संक्रमणपछि निको भएर घर फर्किएका छन् ।अहिले अस्पतालमै भर्ना भएर उपचार गराइरहेकाहरु ७ जना तथा संक्रमणको आशंकामा घरमै आइसोलेसनमा बसेकाहरु झण्डै ४० जना रहेको पनि उपनियोग प्रमुख आरनले बताए ।
दूतावासले सबैलाई सतर्क रहन र अत्यावश्यक काम बाहेक अरु बेला घरैमा बसेर संक्रमण नियन्त्रणमा सघाउन आग्रह गरेको छ ।बेलायतमा आपतविपत खेपेका नेपालीको सहयोगार्थ पहल पनि भएको छ ।
नेपाली दूतावास, एनआरएनए यूके, मर्जिङ नेपसक्स, बन्टोक नेपाली समाज लगायत सामाजिक तथा जातीय संघसंस्थाले प्रकोपका कारण समस्यामा परेका नेपालीलाई सहयोग गरिरहेका छन् ।