रासस
महेन्द्रनगर – सुदूरपश्चिम प्रदेशको प्रतिनिधत्व गर्दै गण्डकी प्रदेशको पोखरामा हुँदै गरेको नवौँ राष्ट्रिय खेलकुद प्रतियोगितामा सहभागी हुने खेलाडी फितलो व्यवस्थापनका बीच सहभागी हुँदैछन् । सुदूरपश्चिम प्रदेश खेलकुद परिषद्को व्यवस्थापनमा खेलाडीको बन्द प्रशिक्षणदेखि अन्य विषयमा सुविधा हुनुपर्ने भए पनि प्रदेश छनोटमा परेका कतिपय खेलका खेलाडीले खेल सामग्रीसमेत पाएनन।
“कञ्चनपुरबाट केही समयाघि नै खेलकुदका पदाधिकारी र कार्यालय प्रमुख नवौँका लागि पोखरा पुगिसके पनि खेलाडी भने जाने क्रम सुरु भएको छ”, एक प्रशिक्षकले भन्नुभयो, “खेलाडीबिना बन्द प्रशिक्षण राष्ट्रिय प्रतियोगितामा जान थालेको यो पहिलोपटक हो ।” जिल्ला छनोटपछि प्रदेशस्तरीय बन्द प्रशिक्षण राख्ने विषयमा सुदूरपश्चिम प्रदेश मौन रह्यो । खेलाडी नियमित प्रशिक्षणबाट राष्ट्रियका लागि गण्डकी प्रदेशतर्फ गैरहेका छन् ।
राष्ट्रिय प्रतियोगिताअन्तर्गत दुई दिनाघिदेखि प्रतियोगिता सुरु भैसके पनि नवौँका उद्घाटन आगामी शुक्रबार हुँदैछ । खेल तालिकाअनुसार यहाँबाट खेलाडी नवौँमा जाने क्रम सुरु भएको हो । यहाँ कतिपय जिल्ला छनोटमा सहभागी प्रशिक्षक÷रेफ्रीलाई समेत दिनुपर्ने भत्ता रकम दीएको छैन ।
यता सुदूरपश्चिम सामाजिक विकास मन्त्रालयले खेलकुदको समग्र जिम्मेवारी प्रदेश खेलकुद परिष्दलाई दीएको जनाएको छ । मन्त्रालयबाट नवौँ राष्ट्रियको व्यवस्थापनका लागि खटिएका नायबसुब्बा डम्बर रावलले प्रदेश सरकारबाट रकम निकासामा ढिलाइ हुनुका साथै बीचमा दसैँ पर्वका कारण प्रदेशको बन्द प्रशिक्षण हुन नसकेको दावी गर्नुभयो ।
“प्रदेश खेलकुद परिषद्ले एक महिना बन्द प्रशिक्षण गर्नुपर्ने प्रास्ताव अघि सारे पनि एक साताको मात्रै स्वीकृत मिल्यो”, उहाँले भन्नुभयो, “जिल्ला छनोट समयमा भए पनि प्रदेशबाट रकम निकास ढिलो हुँदा व्यवस्थापनमा समस्या भयो ।” सुदूरपश्चिम प्रदेश सरकारले खेलकुदका लागि रु चार करोड ९० लाख र राष्ट्रिय खेलकुद परिषद्ले रु ४९ लाख रकम निकास गरेको रावलको भनाइ छ ।
“खेलाडीलाई पोशाक राष्ट्रिय खेलकुद परिषद्ले र यातायात सुविधाका लागि हामी समितिहरू परिचालन गरेका छौँ”, रावलले भन्नुभयो, “खेलाडी, प्रशिक्षक र खेल व्यवस्थापक सोहीअनुसार गैरहेका छन् ।” सुदूरपश्चिमबाट एकल र समूह खेलबाट खेलाडी, प्रशिक्षक र व्यवस्थापक गरी सात सय २० जना सहभागी गैरहेको रावलले बताउनुभयो ।
“खेलाडीहरु लिएर अौनु भनेको छ, बाटो खर्चको व्यवस्थापन पनि आफैँ गर्नुपरेको छ”, एक प्रशिक्षकले भन्नुभयो, “खेलाडीलाई यति फितलो व्यवस्थापनमा लैजानुपर्ने अवस्था कहिल्यै आएको थिएन ।” जिल्ला छनोट हुँदा खेल पोशाक भन्दै महेन्द्रनगरमा खेलाडीलाई जर्सी वितरण गरिएको थियो ।
“प्रदेशबाट छनोट भैसकेपछि खेलाडीलाई खेल सामग्री नदिएर बसेकाहरू अहिले पोखरा पुगेर पदकको आशामा छन्”, एक खेलाडीले भन्नुभयो, “राज्यले दिएको लगानी सदुपयोग गरेमात्रै खेलाडीको अवस्थामा सुधार अौँथ्यो ।”